أخبار وطنية ما قصة عون الحرس المسجون على وجه الخطأ في المنستير؟
نقل بسام بوقرة رئيس جمعية إصلاح المنظومة الأمنية اثر إطلاق سراحه مؤخرا، شهادة مؤثرة لأحد المساجين التابعين لسلك الحرس الوطني والذي تم حبسه بتهمة المشاركة في عملية سطو على بنك في قصر هلال.
وكان بوقرة التقى به وراء قضبان السجن، حيث كشف عون الحرس في شهادته تفاصيل عملية سطو البنك التي تم توريطه فيها ظلما وفق تعبيره، وننقلها إليكم كما نشرها بسام بوقرة على صفحته الخاصة بالفايسبوك كالتالي:
"تتفكروا "عملية السطو على بنك في قصر هلال" ؟
سفيان عون حرس عمرو 50 سنة، زوالي بأتم معنى الكلمة، يدو اليمين مشلولة ( حادث شغل ) وعندو زوز بنات... سفيان كان موجود في البنك كي صارت عملية السطو وفرقة الأبحاث في القرجاني حست إلي سفيان كان موجود في البنك بش ينسق مع السراق الــ7.
أيام إستنطاق في القرجاني شاف فيهم جميع أنواع التعذيب إلي في بالنا معادش موجودة بعد الثورة، وما إستعرفش...
بعد عام في الحبس على ذمة التحقيق، يقابل سجين أخر ويعلموا إلي ثمة مرأة من قصر هلال شافت السارق كي طاح من الدراجة النارية وهو هارب وعرفتو شكون... يخي فرح وفي بالو بش يخرج... تم أخذ شهادة المرأة هذي ستة شهور لتالي لكن ما صار شي...
سفيان في الحبس عندو عام ونص تحت ذمة التحقيق من غير حتى موعد جلسة، وكل ليلة يبات "معنق" تصويرة بناته إلي ما شافهمش ملي تشد ويبكي...
سفيان مهوش مدون، و مهوش مغني راب وإلا باعث قناة بش الشعب يقف معاه و ياخو حقو...
سفيان مواطن تونسي زوالي ضحية منظومة بوليسية فاشلة تحب تسكر ملف القضية بأي ثمن... وأنا خارج من الحبس، غزرلي سفيان وعينيه بدموع وقلي: " عيش خويا ما تنسانيش... راني مظلوم..."
دموعي هبطت كي الولد الصغير.. شكون من صحابي المحامين الحقوقيين ينجم يعاوني ناخذو حق بنات سفيان؟".
ويذكر أن 5 محامين تطوعوا للمرافعة عن السجين المذكور بعد نشر بسام بوقرة لهذه الشهادة..
منــارة تليجاني
